សាកលវិទ្យាល័យចំប៉ាសក្តិ ចាប់ផ្តើមបង្កើតឡើងក្នុងឆ្នាំ២០០២ និងត្រូវបានទទួលស្គាល់ជាសាខាមួយរបស់សាកលវិទ្យាល័យរដ្ឋក្នុងប្រទេសឡាវ។ សាកលវិទ្យាល័យ នេះជាឈ្មោះថ្មីរបស់សាកលវិទ្យាល័យដែលត្រូវបានកែប្រែក្នុងឆ្នាំ២០០៤។ សាកលវិទ្យាល័យនេះមានទីតាំងនៅក្នុងទីក្រុងប៉ាកសេ Pakse ខេត្តចំប៉ាសក្តិ Champasack ដែលជាទីក្រុងដែលមានប្រជាប្រិយភាពជាប់ ចំណាត់ថ្នាក់ទី២នៅក្នុងប្រទេស។ សាកលវិទ្យាល័យនេះមានចក្ខុវិស័យអភិវឌ្ឍន៍ខ្លួនអោយក្លាយទៅជាមជ្ឈមណ្ឌលអប់រំ ស្រាវជ្រាវ និងសេវាកម្មបច្ចេកវិទ្យា ក្នុងប្រទេសឡាវ។ សាកលវិទ្យាល័យ Champasack ដើរតួយ៉ាងសំខាន់ក្នុងការផ្តល់ឱកាសជូនដល់ប្រជាពលរដ្ឋទទួលបានការអប់រំថ្នាក់ឧត្តមសិក្សាក្នុងបណ្តាខេត្តក្នុង ភូមិភាគខាងត្បូងនៃប្រទសឡាវព្រមទាំង អប់រំប្រជាពលរដ្ឋឱ្យលើកកម្ពស់វប្បធ៌មដ៏ស្រស់ត្រកាលរបស់ប្រទេសខ្លួននិងប្រជាជន ព្រមទាំងសង្គមជាតិផងដែរ។ សាកលវិទ្យាល័យ Champasack ផ្តល់ជូននិស្សិតនូវកម្មវិធីសិក្សាថ្នាក់បរិញ្ញាបត្រចំនួន ២៧ក្នុងមហាវិទ្យាល័យចំនួន ៦រួមមាន មហាវិទ្យាល័យកសិកម្មនិងព្រៃឈើ មហាវិទ្យាល័យអប់រំ មហាវិទ្យាល័យគ្រប់គ្រង និងសេដ្ឋកិច្ច មហាវិទ្យាល័យវិស្វកម្ម មហាវិទ្យាល័យវិទ្យាសាស្រ្តធម្មជាតិ និងមហាវិទ្យាល័យនីតិសាស្រ្ត។ ថ្នាក់ក្រោយបរិញ្ញាបត្រចំនួន ២នឹងត្រូវដាក់ឱ្យដំណើរការក្នុងឆ្នាំ២០២០នេះជាផ្លូវការ។ ក្នុងនោះរួមមានថ្នាក់អនុបណ្ឌិត MSc ដែលស្ថិតនៅក្រោមគម្រោង SFARM of Erasmus+ programes និងថ្នាក់អនុបណ្ឌិត អគ្គីសនី។ សាកលវិទ្យាល័យ Champasack មានបុគ្គលិកសរុបចំនួន ៤២៦នាក់ ក្នុងនោះ ៣៥៩នាក់ជាបុគ្គលិកផ្នែកបង្រៀន និង៤៤នាក់ជាបុគ្គលិករដ្ឋបាល (ស្ថិតិឆ្នាំ២០១៩)។ នាពេលបច្ចុប្បន្ននេះនិស្សិតសរុប ៦០៦៦នាក់កំពុងសិក្សាក្នុងថ្នាក់បរិញ្ញាបត្រ។